Ara rē, ara rē
E ai ki aku kuia, ko tā ngā patupaiarehe mahi, he makamaka pere i waenganui i a rātou, ā, ka whiti mai i tērā maunga ki tērā maunga. He whakataetae hoki te mahi, ka whiua kia kitea ai nā wai te tiu tere rawa. Koinei ngā tākaro a taua iwi. Kei tērā maunga tōna anō patupaiarehe e noho ana hei rangatira mō ngā parehe o mea maunga, o mea hiwi, o mea ngahere. Koinei te takunetanga o te poi nei, kia ora mai ai ngā kōrero o ngā patupaiarehe i roto i tēnei whakatupuranga. Mā te rērere haere hoki ki tērā maunga me tōna takiwā ka mihia te iwi Māori nei nōna taua maunga.
Maori lyrics
Ara rē, ara rē tana pere e makamaka mai rā
Pūkohukohu te tihi ki Wharepūhunga
Ka kitea te tiu e netineti mai ana
Ki te maunga e tautari mai rā
Ara rē, ara rē tana pere e makamaka mai rā
Kei Pureora, Rangitoto, Titiraupenga
Ko Tarapīkau e rehurehu haere ana
Whio atu, whiowhio, whio mai
Korowhiti, korowhiti, korowhīrona
Tekateka mai rā
Ko te iwi paiarehe, ko te iwi tupua
He māminga, ara rē nanakia, he nukanuka
E Te Atakohu i ngā hiwi i te uru
Ko koe ki te whenua, ko Tamakaiuru ki te rangi
Māna tō tārerarera hei whiu
Ara rē, ara rē tana pere e makamaka mai rā
Ki Puawhe ko Whanawhana-i-te-rangi
Topa atu ki Te Aroha ki Te Ruaiti
Hoka i konā ki Taputeuru rā (uru rā)
Ara rē kei Pukemoremore tana tau paepae e noho mai rā
Ko te iwi paiarehe, ko te iwi tupua
He māminga, ara rē nanakia, he nukanuka
Kei rekareka atu e te puni wāhine
Kei te whakawai mai rā a Te Rangipōuri
Puritia, tāwhia e tamangarengare mā
Tēnā tōna pere muramura e teretere mai rā
Ara rē, ara rē tana pere e makamaka mai rā
