Mōteateatia te uri o Tūhoe Pōtiki
Mai i tōku tamarikitanga, i kōrerotia e ōku kaumātua te toa o Ngāi Tūhoe, i haramai rā ki O-Rākau. Mai i tērā wā ki tēnei rā, ka pupū tonu te aroha i a au mō ngā tamariki o te kohu. I a mātou ko te komiti e whakarite haere ana i te whenua i rangona ai te riri, mō te whakamaharatanga o te tau 150 mai i te pakanga o O-Rākau, ka rongo au i ō rātou wairua, me taku pātai ‘kei whea koutou e takoto nei?’ Me ngā tini whakaaro. Nā wai rā ka tangi, ka puta mai he kupu, ka puta mai he rangi. Nei rā te waiata.
Maori lyrics
Ka tū au ki runga o Te Aratītaha
Ka titiro ki Te Urewera
Aku ika a Whiro
Aku uretoa kairākau!
Koutou i mate ai i te marae o te riri ki O-Rākau!
Okioki mai, oki mai!
Māringiringi mai ana ngā roimata rurutu kino
He hōpuapua i aku kamo mō te huinga o te kura
E moe mai nā i te moremore o te whenua
Hīrearea noa rā te tangi a te iwi nui i te pō
I ōku taringa e hākiri nei ki te āta whakarongo
Ki ngā maimai aroha a ngā pouwaru mō te puhi o Mātaatua
I haramai rā i Te Urukāraerae
I haramai rā me Te Rehu o Tainui
I haramai rā i Te Tini o Hinepūkohurangi
Mōhukihuki te mamae roa ki te tau o taku ate
E haehae nei i te rironga o te rau o tītapu
Ka turakina mai taku wao tōtara
Ka tangihia rā i Manawarū
Ka tangihia rā i Wharepūhunga
