Paraone Gloyne

He kaitito rongonui a Paraone Gloyne, he kaikōrero, he kaihaka anō hoki. Kua puta te ihu o Paraone i Te Panekiretanga o Te Reo Māori, ā, kua roa hoki e whakapau werawera ana kia ora mai ai te reo Māori me ngā tikanga Māori. Kua whai wāhi ia ki ētehi kaupapa huhua i roto i ngā iwi, puta noa hoki i te motu. Kua hau ōna rongo mō tana kōkiri i te kaupapa o Mahuru Māori i te tīmata rā i te tau 2014 hei whakatairanga i te kōrerotia o te reo Māori i roto i ngā mahi o ia rā, o ia rā. Nā ana mahi rā i whiwhi ai ia i te tohu o Te Waitī mō Te Reo me ngā Tikanga i Ngā Tohu ā-Tau o Matariki i te tau 2018.

Ko Paraone rāua ko tana wahine ko Ngāhuia Kopa, ngā kaiako me ngā kaiārahi o Mōtai-tangata-rau. He kapa haka tēnei nō Ngāti Raukawa ki Uta i whakatūria i te tau 2005. I puta tuatahi mai te kapa i te whakataetae ā-rohe o Tainui i te tau 2012, ā, i toa rātou i taua whakataetae i te tau 2014, kātahi ka tū rātou ki Te Matatini i te tau 2015. I uru a Mōtai-tangata-rau ki te whiringa whāiti o Te Matatini i te tau 2017.

I Te Matatini o te tau 2015 i toa a Mōtai-tangata-rau i te tohu mō te kairangi o te reo Māori i roto i ngā titonga me te tū a te kapa, he tohu tēnei i te tohunga o Paraone ki te tito waiata. He ngahau, he pārekareka te āhua o tā Paraone tito waiata. Kua mōhiotia tana raweke i te kupu me te kore hoki ōna e wehi ki te whakatara i ngā take o te wā me tana āhei ki te tākirikiri i ngā tauwharenga o te ngākau o te hunga whakarongo i tana tīpako i ngā kupu me te whakatakoto i aua kupu ki roto i te rangi, i te taki rānei e tika ana. He kaiwhakawā kapa haka hoki a Paraone, ā, ko ia hoki te māngai o ngā kapa o Tainui i te Poari ā-Motu o Te Matatini.